మనం చేసే ఈ 4 తప్పులే ఆయుష్షును తగ్గించేస్తున్నాయ్.. జపనీయుల సీక్రెట్ ఇదే!

ఎక్కువ కాలం ఆరోగ్యంగా జీవించే ప్రజలు అనగానే మనకు వెంటనే జపాన్ దేశస్థులే గుర్తుకొస్తారు. వారి సగటు ఆయుర్దాయం ఏకంగా 85 సంవత్సరాలు. అయితే, వారితో పోలిస్తే భారతీయుల సగటు జీవితకాలం సుమారు 13 ఏళ్లు తక్కువగా ఉన్నట్లు తాజా డేటా స్పష్టం చేస్తోంది. ఈ భారీ తేడాకు కారణం జన్యువులు కాదు, మన దైనందిన జీవనశైలేనని వైద్య నిపుణులు విశ్లేషిస్తున్నారు. ఆహారం, పనివేళలు, నిద్ర, శారీరక శ్రమ వంటి చిన్న చిన్న విషయాల్లో మనం చేసే పొరపాట్లే మన ఆయుష్షును హరించివేస్తున్నాయని వారు హెచ్చరిస్తున్నారు.

ఆహారం, నడకలోనే అసలు తేడా
జపనీయుల రోజువారీ జీవితంలో శారీరక శ్రమ ఒక భాగం. వారు దగ్గరి ప్రయాణాలకు ఎక్కువగా నడకను, సైకిల్‌ను ఆశ్రయిస్తారు. రోజూ సగటున 7 వేల నుంచి 10 వేల అడుగులు నడవడం వారికి సర్వసాధారణం. కానీ, భారతదేశంలోని పట్టణ ప్రాంతాల్లో పరిస్థితి దీనికి పూర్తి భిన్నంగా ఉంది. చాలామంది రోజుకు 3 వేల అడుగులు కూడా నడవడం లేదు. చిన్నపాటి దూరాలకు కూడా బైక్‌లు, కార్లపై ఆధారపడుతున్నారు.

ఆహారపు అలవాట్లలోనూ ఈ వ్యత్యాసం స్పష్టంగా కనిపిస్తుంది. జపనీయులు ఉదయం అల్పాహారంలో ప్రొటీన్లు ఎక్కువగా ఉండే మిసో సూప్, అన్నం, గ్రిల్డ్ చేపలు వంటివి తీసుకుంటారు. మన దగ్గర మాత్రం నెయ్యి, వెన్నతో చేసిన పరోటాలు, కార్బొహైడ్రేట్లు అధికంగా ఉండే టిఫిన్‌లకే ఎక్కువ ప్రాధాన్యమిస్తారు. దీనివల్ల ఊబకాయం, మధుమేహం వంటి సమస్యలు చిన్న వయసులోనే దాడి చేస్తున్నాయి.

పని ఒత్తిడి, నిద్రలేమి
పని విషయంలో జపనీయులు కచ్చితత్వానికి మారుపేరుగా ఉన్నా, వారు సగటున రోజుకు 8.5 గంటలు మాత్రమే పనిచేస్తారు. కానీ, భారత్‌లో పనిగంటలు 10 నుంచి 12 గంటల వరకు ఉంటున్నాయి. దీనికి ప్రయాణ సమయం అదనం. ఎక్కువసేపు కదలకుండా కూర్చోవడం, పని ఒత్తిడి ఆరోగ్యంపై తీవ్ర ప్రభావం చూపుతున్నాయి.

ఆరోగ్యానికి అత్యంత కీలకమైన నిద్ర విషయంలోనూ మనం వెనుకబడే ఉన్నాం. జపనీయులు సగటున 6 నుంచి 7 గంటలు నిద్రపోతే, భారతీయులు కేవలం 5 నుంచి 6 గంటలకే పరిమితమవుతున్నారు. దీర్ఘకాలిక నిద్రలేమి గుండె జబ్బులు, మధుమేహం వంటి తీవ్ర ఆరోగ్య సమస్యలకు దారితీస్తుందని, ఇది అకాల మరణానికి కూడా కారణం కావొచ్చని నిపుణులు హెచ్చరిస్తున్నారు. జీవనశైలిలో చిన్న చిన్న మార్పులు చేసుకోవడం ద్వారా ఆరోగ్యాన్ని, ఆయుష్షును పెంచుకోవచ్చని వారు సూచిస్తున్నారు.